ఆ రోజులకో వాసనుంది

ఆ రోజులకో వాసనుంది..

17-5-2024 శ్రీశాంతి మెహెర్

.................................

ఆ రోజులకో వాసనుంది.

అమ్మలాంటి కమ్మనైన వాసన 

నేతి ముద్దలు తిన్న కమ్మదనం అది

వెన్నెలంత చల్లదనం

స్వేచ్ఛ తప్ప మరో మాట తెలీని రోజులవి

కాళ్ళకు పరుగు తప్ప, అలసట తెలీదు..

బద్దకంగా పక్క దులిపిన రోజులు

మిక్చర్ పొట్లం తెచ్చిన గొడవలో

గోళ్ల రక్కులు, పంటి గాట్లు

తమ్ముడితో కుస్తీపట్లు

అమ్మతనం చేతకాని రోజుల్లో 

పెద్దరికాన్ని భుజాన వేసుకుని 

అరిందాతనం

ఆ రోజులకో వాసనుంది..

కమ్మదనం తప్ప మరో మాట

తెలీని రోజులవి. 

తిరిగిరావు.. తెంపి తెచ్చుకోలేము

మనకు పుట్టిన బిడ్డల్లో బాల్యాన్ని 

కాసేపు చూసి మురిసిపోగలం 

మహా అయితే..