Wednesday 27 March 2024

ఈ ఖాళీలను పూరింపుము..!!


శ్రీశాంతి.. 28-3-2024


ఖాళీతనం ఒక్కోసారి మరీ ఇబ్బంది పెట్టేస్తుంది. అది బుర్రలో పుట్టి, ఆలోచనను కూడా ఖాళీ చేసి ఏదీ తోచకుండా చేసిపారేస్తుంది. కొన్ని ఖాళీలను పరిస్థితులు సృష్టించి పారేస్తే.. మరికొన్ని మనమే సృష్టించుకుంటూ ఉంటాం. ఈ ఖాళీలో నింపేయడానికి ఏదీ సరిపోదు. నిండుగా వాకిలంతా అలుముకున్న చెట్టు నేలకూలిపోతే ఏర్పడే ఖాళీలాంటిది. ఇంటి పెద్ద మాయం అయిపోతే కలిగే ఖాళీ.. నచ్చిన మనిషి దూరం అయితే కలిగే ఖాళీ.. మనసుకు ఇలాంటి ఖాళీలు అలవాటు కావు కనుక ఇబ్బందిలో, ఉక్కిరి బిక్కిరిలో ఏదీ తోచక ఏర్పడే ఖాళీ..


ఏం చేయాలో తెలిసి కూడా చేయలేకపోవడం, చేయాలనన్నా మనసుకు రాకపోవడం, నిజానికి ప్రతి ఒక్కరికీ ఎదురవుతూనే ఉంటుంది ఇలాంటి పరిస్థితి. కాకపోతే ఆ ఖాళీని పూరించడం మాత్రం అంత సులువైన పనికాదు. రాయాలనుకున్న విషయం గురించి ఏదో ఆలోచన మొదలైనా రాయలేని ఇబ్బందిలాంటిదే ఇదీనూ..


నేను అప్పుడప్పుడూ ఏదో రాసేయాలని కూర్చుంటాను. చాలా అంటే చాలా సీరియస్గా.. కానీ తీరా కూర్చున్నాకా ఏదీ తట్టదు. అప్పటి వరకూ బుర్రను పట్టుకుని కుదిపేసిన ఆలోచనలు.. ఒక్కసారే రెక్కులు తొడుక్కుని ఎగిరిపోతాయి. ఇంకేముందీ.. ఇంతక మునుపు ఉన్న ఖాళీకన్నా ఇప్పుడు ఇంకాస్త పెరిగి కనిపిస్తుంది.. బుర్రలో ఖాళీ..


నిన్న ఉన్న విశాలమైన ఆలోచనలు,, ఆత్రం ఈరోజు లేనట్టే.. రాయాలనుకునే విషయాన్ని తక్షణమే రాయలేకపోతే ఏదో వెలితిలోకి పోతుంది. మనసుకు చాలా అలవాటు కావాలి. బంధాలనుంచి దూరంగా తప్పుకుని ఒంటరి జీవితంలో ఉన్నప్పుడు మాత్రమే కొన్ని తెలిసి వస్తాయి. అదెలాగంటే.. ఆకు నిండా ఉన్న పదార్థాలను తినలేని పరిస్థితికన్నా,, తినడానికి ఆ పూటకి దొరికిన పప్పే, పరమాన్నం అనుకుని తినేయగలిగే తృప్తి ఉంది చూడండి అలాంటి పరిస్థితి ఉంటేనే బ్రతకు బరువు తెలుస్తుంది. 


అలా ప్రతి ఖాళీనీ పూరించుకుంటూ వస్తే.. చివరి మజిలీ కాస్త భయపెట్టేదే అయినా అలవాటు పడిపోతాం. ముసలితనం ఈ మధ్య భయపెడుతుంది నన్ను.. ఆ వయసుకు వస్తే.. నేను ఎలా ఉంటానో.. రూపంలో కాదు.. ఆరోగ్యపరంగా నా పరిస్థితి ఏంటీ అని తెగ కంగారుగా ఉంటుంది. కానీ మళ్లీ తమాయించుకుంటాను. ఖాళీలను పూరిస్తూ వస్తున్న నేను ఈ ఖాళీని కూడా పూరించుకుంటూ పోగలను అని నా విశ్వాసం. మీకూ ఇలాంటి భయాలే ఉండి ఉండచ్చు.. కానీ నాలా చెప్పుకోరు అంతే.. నిజమేనా..?

Friday 22 March 2024

వైరాగ్యానికి అటు ఇటు..


శ్రీశాంతి.. 23-3-2024

కంఫర్ట్ దీనిని ప్రతి ఒక్కరూ ఆశిస్తూనే ఉంటారు. జీవితంలో ఎన్ని చేసినా కూడా అవన్నీ కంఫర్ట్ కోసమే.. ఎన్ని కష్టాలు పడినా కూడా సౌకర్యం కోసమే.. లేకపోతే ఎందుకీ పాడు బతుకు అనిపిస్తుంది. నిజానికి ఎక్కడెక్కడ తిరిగినా రోజులో ఎక్కడ తిరిగి వచ్చినా, కూడా ఇంటికి చేరే సరికి కలిగే ఆనందం వేరు. నా వరకూ నాకు మెట్లెక్కి నా ఇంటి గుమ్మం ముందుకు చేరుకోగానే.. ఓ పాజిటివ్ నెస్ కనిపిస్తుంది. కొత్త ప్రదేశంలో ఎన్ని సౌకర్యాలు ఉన్నా కూడా మన ఇంటి మంచం మీద పడుకున్నప్పుడు పట్టే నిద్రే నిద్ర. 

హాల్లో చిన్న బొంత మీద కూర్చున్నా అదే ఆనందం. చుట్టూ మనం నాటుకున్న మొక్కల మధ్యలో కాసేపు నిలబడినా,  నచ్చిన పాట వింటూ సమయం గడిపినా ఎక్కడ దొరుకుతుంది ఇలాంటి ఆనందం. 

ఇక తిండి విషయానికి వస్తే.. నాలుకకు కొత్త రుచులు కావాలి. రోజులో ఎంత చెత్త తినాలన్నా కూడా అది ఎప్పుడూ సిద్ధంగా ఉంటుంది. తిండి విషయంలో ఒకప్పుడు ఉన్న చాపల్యం ఇప్పుడు తగ్గిందనిపిస్తుంది. ఏదో తినేయాలన్న ఆత్రం తప్పితే చక్కగా అన్ని కూరగాయలూ వేసుకుని పెట్టుకున్న దప్పళం ముందు ఈ పిచ్చి తిళ్ళు ఏం బావున్నాయనిపిస్తుంది. పులిహోరను కొట్టే వంటకం మరొకటి ఉందా అనిపిస్తుంది. ఏంటో రోజు రోజుకూ నేను చేసుకుతినే వంటకాలు తప్పితే బయటివి నచ్చడం లేదు. అలా అని ఇప్పుడే సన్యాసం పుచ్చుకోవాలనీ లేదు.. మరీ తిండి మీద యావ చంపేసుకు బతికేస్తే ఇక గొడ్డుకి మనిషికీ తేడా ఏముంది. 

కాకపోతే ఆరోగ్యం మీద కాస్త శ్రద్ధ పెరిగింది. రేపు నేను ఎలా ఉండబోతున్నానో అనే ఆలోచన రాగానే వెంటనే తినాలనే యావ చచ్చిపోతుంది. కాలాన్ని గిర గిర తిప్పే పని పెట్టుకున్న మహానుభావుడు ఎవరో గానీ.. కనిపిస్తే కాళ్ళు కడిగి నెత్తిన చల్లుకోవాలనిపిస్తుంది. ఎందుకు త్వరత్వరగా కాలాన్ని జరుపుకుంటూ పోతున్నాడో ఏమో.. ఒక్కోరోజూ మారుతున్న కొద్దీ ఒక్కో రకమైన ఆలోచన కలుగుతుంది. 

నిన్నటిలా నేడు ఉండదు. నేటిలా మరో రోజు మారదు. కాకపోతే ఉన్న క్షణాలను అందంగా మలుచుకోవడమే జీవితం. ఏంటో నాకు కొత్తగా వైరాగ్యం కూడా అంటుకుంటుంది ఈ మధ్య. వయసుదాటిన ఎవరిని చూసినా నా రాబోయే రోజులు గుర్తుకు వస్తున్నాయి. మనసంతా బాధగా ఉంటుంది. మరీ ఎక్కువ ఆలోచించేస్తున్నాననిపిస్తుంది. కానీ.. ఇదంతా చక్రం.. జీవన చక్రం.. అందులో వద్దన్నా జరిగే మార్పులు అంతే.. సర్దుకోవాలి.. నిజాన్ని అంగీకరించాల్సిందే.. నిజమే కదా.

Thursday 21 March 2024

హృదయం నిండా.. పూల వాసనలే.. !


Sri santhi 22-3-2024

అందమంతా ప్రకృతిదే అయితే అది చూసి మురిసిపోయే నా జన్మ ధన్యం. ఈ చూసే కళ్ళకు కనిపించేదంతా అందమే.. ఈ భూమిమీద ఈ జీవితంలో నేను అనే మనిషిని అన్ని వాసనలను, అందాలను, సౌందర్యాన్నీ, కష్టాన్ని, సుఖాన్ని అనుభవించగలుగుతున్నానంటే అది నిజంగా దేవుడి దయే.. 


సరే అందం అనుకున్నాం కదా.. నేను ఆగి మరీ చూసే అందం మొక్కలది. పూలది.. వాటి సువాసనలది.. సన్నజాబులు, మల్లెలు, పారిజాతాలు, చామంతులు, గులాబీలు ఇలా చెప్పుకుంటూ పోతే బోలెడు పూలు, బోలెడు అందాలు, అందమైన ముఖాలకన్నా పూలను చూసినప్పుడు కలిగే ఆనందం వేరు. వాటి వెనుక నేను ఆలోచించే, మురిసిపోయే క్షణాల ఆనందం మరింత గొప్పది.. నిజానికి మొక్కలంటే నాకు ఎందుకు ఇష్టమో చెప్పాలంటే బాల్యం వైపుకు చూడాలి. ఎందుకో మొక్కలు మాట్లాడతాయి అనిపిస్తుంది. చక్కని పూలతో రకరకాలుగా వాటికి తగినట్టుగా నవ్వుతాయి. ఆ నవ్వులో నాకు ఓ ఆత్మీయత కనిపిస్తుంది. నాకు మొక్కలను చూడగానే పూనకం వస్తుందని ఇంట్లో అంటారు కానీ .. మొక్కలను కొని తెచ్చి ఇంట్లో పెట్టి పెంచడం అంటే వాటికి కొత్త వాతవరణాన్ని పరిచయం చేయడం లాంటిదే.. 


కానీ ఏమాటకామాట.. అందంగా పెంచుకున్న మొక్కకు ఓ పువ్వు పూసిందనుకోండి. ఎంత ఆనందమో కదా.. భలే అనిపిస్తుంది. నాకైతే సంబరమే.. మొన్నామధ్య మా దగ్గరలో సింహాచలం సంపెంగ మొక్కను చూసాను. కాస్త రేటు ఎక్కువే చెప్పాడు. రెండు రోజులు తిరిగి మొత్తానికి మొక్కను అతి  కష్టం మీద మా బాల్కనీలోకి తెచ్చాను. దానికి ఇంకా మొగ్గలు రాలేదు. ఫిబ్రవరి 13న కొంటే మార్చి 20న పువ్వు పూసింది. ఇక నా సంబరానికి అవధులు లేవంటే నమ్మండి. బయట ఈ పువ్వులు దొరకడం కష్టం.. ఒకవేళ దొరికినా పువ్వు 20 రూపాయలు అమ్ముతున్నారు. ఎందుకో ఇది పూసాకా కోయబద్ది కాయలేదు. ముసిపోయాను అలా చూసుకుంటూ.. మీకూ ఈ పువ్వు ఇష్టమేనా..


ఒకప్పుడు మొక్కలు కొనితెచ్చి వాటిని పెంచి, చూసి మురిసిపోయి.. ఇలా ఉండేది. ఇప్పుడు సమయం కుదరడం లేదు.. పైగా ఇల్లు ఇరుకుగా ఉండటం కూడా మొక్కల మీద మక్కువను చంపేస్తుంది. ఓ కార్నర్‌లో పెట్టి పెంచుకోవాలి తప్పితే పెద్దగా వేరే మార్గంలేదు,. పాపం వాటిని ఇలా బంధించి పెంచడం ఇష్టలేక వదిలేస్తున్నాను. కాకపోతే ఎటన్నా పోతున్నప్పుడు మొక్కలవాడు కనిపిస్తే మాత్రం బుట్టలో మొక్కల్ని చూసి మురిసిపోవడమే.. ఏంటో బాధగా ఉంటుంది. అయ్యో వీటిని తీసుకుని వెళ్ళలేకపోతున్నానే అని. మనసులో మాత్రం గట్టిగా అనుకుంటాను. ఎందుకు నేను ఇంట్లో ఉండే సమయం తక్కువ కదా.. ఆదివారాలు తప్పితే కదరదు కదా.. అలాంటప్పుడు వీటిని పెంచే బాధ్యత మీద వేసుకోవడం.. ఇంట్లో చివాట్లు తినడం అవసరమా..అని.


అవును.. చివాట్లంటే గుర్తుకు వచ్చింది. మీ ఇంట్లో కూడా ఇలానే తిడతారా.. వీధిలో కనిపించిన ప్రతి మొక్కనూ ఎత్తుకొస్తావు,. వాటిని తెచ్చాకా చూసే నాధుడు ఎవరు. డబ్బులన్నీ తగలేస్తున్నావని. మొక్కలు కాళ్లకి అడ్డంగా ఉన్నాయని.. ఇల్లు మారేప్పుడు ఎవరు ఎత్తుకెళతారు అంత బరువైన కుండీలని.. ఇలా ఆ క్షణానికి తగిన విధంగా.. గుర్తుకు వచ్చిన తిట్లన్నీ తిట్టి పోయడం లాంటివి ఏమైనా ఉంటాయా.. ఉండే ఉంటాయి. కదా..

Monday 18 March 2024

కాల తప్పిపోయింది..

.. 19-3-2024


కొన్ని కలలు భయపెడతాయి.. కొన్ని మళ్ళీ మళ్ళీ గుర్తుచేసుకునేంత బావుంటాయి. కొన్ని తరిమితే.. మరికొన్ని భ్రమలో ఉండేట్టు చేస్తాయి. భయపెట్టేవి కూడా కలలే.. కలలే రాని నాకు చాలా రోజుల తర్వాత కలవచ్చింది. అంటే కల రాకపోవడం కూడా ఓ బాధే.. అందమైన ప్రదేశాలు... అనుకున్నవి కలగన్నవి.. ఆశించినవి ఇలా అన్నీ కలల్లా వచ్చేస్తే.. బావుంటుందని మరీ కలగనడం బావుంటుంది. అలా కలను నటించే రోజుల్లోనే నేను ఆగిపోయాను. కానీ ఈరోజు కల వచ్చింది. 


ఒకింత ఆశ్చర్యం.. ఒకింత బాధ.. ఇదేంటి నేను నన్ను గురించి వెతుకుతున్నానా.. ఇదో వింత కల. నా వరకూ నాకు చాలా చిత్రంగా అనిపించింది. బహుశా వేళకు మించి నిద్రపోవడమో.. లేదా శరీరం బాగా అలిసిపోవడమో కారణం అయి ఉండవచ్చు. నిజానికి నాకు కల వచ్చిందంటేనే వింతగా ఉంది. 


ఇంతకీ ల్యాగ్ చేయకుండా చెప్పాలనుకునే విషయం ఏంటంటే నా కలలో నన్ను నేనే వెతుకుతున్నాను. కానీ ఆ పెద్ద ఇంట్లో నాలా మరో ఇద్దరు కనిపిస్తున్నారు. పోనీ అచ్చం నాలాగే ఉన్నారా అంటే అలానూ లేరు. చొట్ట ముక్కులు,. తపేలా ముఖాలు.. ఛా ఈ వింత ముఖాలని శాంతి అంటున్నారేంటిరా నాయనా అని.. మళ్ళీ ఆగి చూస్తే ఇంతకీ నన్ను అక్కడ ఎవరూ గుర్తుపట్టడం లేదు. ఎంత నేనేరా శాంతిని.. ఎవరినో నేనంటారేంటి.


నాకు ఆస్తిలో వాటా ఇవ్వాలని ఇలా నాటకాలాడుతున్నారా ఏంటి.. ఇదంతా కుట్రలా గుందే. దీనికంతకీ నేను ఒప్పుకోను. ఛాఛా .. ఇంత చెండాలంగా ఉందేంటి నాకల..
తెగ తిట్టుకున్నాను. ఆ ముఖాలు చెంబులు, తపేలాలుగా ఉండటమే కాదు. ముఖాలకు సున్నం రాసుకుని మరీ వింతగా ఉన్నాయి. అవి నేనని ఎందుకు అంటున్నారో కూడా అర్థం కాలేదు. చివరికి వాటిని పట్టుకుని, నాలుగు తన్ని, "ఎవర్రా మీరంతా" అని గట్టిగా పేగులు తెగేలా అరిచి ముఖాలను గీకి లాగితే.. అవి ముసుగులని తేలింది. ఇంత పెద్ద కుట్ర పన్నిన వాడు ఎవడా అని కలంతా కలియతిరిగి ఇల్లు చేరుకున్నాను. ఆ ఇంట్లో మా ఫణిగాడు, బుడ్డోడు కనిపించారు. హమ్మయ్యా ఇప్పటికైనా సరైన ఇల్లు చేరాను. 


బాబోయ్.. ఇలా కలలో కూడా ఇల్లు మారిపోకూడదు. మారితే ఇదిగో ఇలాగే గందరగోళంగా ఉంటుంది. అని అనుకుని కళ్లు తెరిచాను. ఇంతకీ అప్పటికి టైం ఆరు.. అంగలారుస్తూ ఉద్యోగానికి పరుగుపెట్టే టైం అయిందని పరుపు మీంచి ఒక్క గంతున లేచాను.. హమ్మయ్యా.. శ్రీశాంతి మెహెర్

Monday 1 January 2024

కలలాంటి నిజం వెనుక .. 2-1-24


నక్షత్రాలు రాతిరిని అంటుకుని.. ఉండిపోయాయి..
నీ ఆలోచనలు నన్ను పట్టుకుని వదలనట్టు
నిండిపొర్లే నీటిని చేపలు వదిలిపోతాయా..
నీ రహస్యాలు తెలిసిన మనసు మాసిపోనట్టు..


దీపాల్ని తీసి చూసినా నాకలల అంచుల్లో నీ ఊహే..
చీకటినలుపుల మధ్య నీ ఊహ మధురం..
నిన్ను తెలుసుకునే ప్రయత్నంలో..
వెచ్చని కౌగిలి హృదయానిక అడ్డంగా వచ్చినట్టు


మెరుస్తుంది.. నక్షత్రంలా.. నా కళ్ళల్లా..
వొంటరితనాన్ని సైతం ఆవరించే సమక్షం నీది..
కావలించుకుని నాకు నీ వెచ్చదనాన్ని గుర్తుచేస్తూ..
ఇంకేం అడుగకు.. తక్కింది నా కలలో ఉంది. (శ్రీ)

Thursday 28 December 2023

మళ్ళీ మనం ప్రేమను తెచ్చుకునేంత

మళ్ళీ మన ప్రేమను తెచ్చుకునేంత...
.................................................    (శ్రీశాంతి)


ఈ ముఖం చీకట్లో నీడలు పడి గాయపడింది..

ప్రాణానికి ప్రేమగాయం సెగ తగులుతుంది.

చాలా సమీపంగా వచ్చేసిన నీకు తెలియంది కాదు.

నా హృదయాన్ని పట్టి పీడిస్తున్న ఆలోచనల వెంట

నిశ్చలమైన హృదయం కోసం పడే ఆరాటం..




ఎవరికీ తెలీకుండా నిన్ను దాచుకోవాలని లేదు.

నీకు చాలా సమీపంగా వచ్చాను.

గాయాలను మాన్పే శక్తి నీ ప్రేమకుందని నమ్మి

నువ్వు నా దుఃఖంగా మారేంత వరకూ అదే నమ్మకం



మనసు వీగిపోయేంత వరకూ అదే నమ్మకం

రొదల వెంట పరుగులు పెట్టేంత వరకూ

చేతి నుంచి మృత్యువు జీవాన్ని లాక్కున్నేంత వరకూ

అదే అదే నమ్మకం..


నీకెదురుతిరిగి పోట్లాడి మళ్ళీ మన ప్రేమను తెచ్చుకునేంత
వరకూ

నిన్ను నా సమస్తంగా మార్చుకునేంత పిచ్చి నమ్మకం..

తేదీ మారుతుందా?

మళ్ళీ మన ప్రేమను తెచ్చుకునేంత...
.................................................    (శ్రీశాంతి)


ఈ ముఖం చీకట్లో నీడలు పడి గాయపడింది..

ప్రాణానికి ప్రేమగాయం సెగ తగులుతుంది.

చాలా సమీపంగా వచ్చేసిన నీకు తెలియంది కాదు.

నా హృదయాన్ని పట్టి పీడిస్తున్న ఆలోచనల వెంట

నిశ్చలమైన హృదయం కోసం పడే ఆరాటం..




ఎవరికీ తెలీకుండా నిన్ను దాచుకోవాలని లేదు.

నీకు చాలా సమీపంగా వచ్చాను.

గాయాలను మాన్పే శక్తి నీ ప్రేమకుందని నమ్మి

నువ్వు నా దుఃఖంగా మారేంత వరకూ అదే నమ్మకం



మనసు వీగిపోయేంత వరకూ అదే నమ్మకం

రొదల వెంట పరుగులు పెట్టేంత వరకూ

చేతి నుంచి మృత్యువు జీవాన్ని లాక్కున్నేంత వరకూ

అదే అదే నమ్మకం..


నీకెదురుతిరిగి పోట్లాడి మళ్ళీ మన ప్రేమను తెచ్చుకునేంత
వరకూ

నిన్ను నా సమస్తంగా మార్చుకునేంత పిచ్చి నమ్మకం..

ఈ ఖాళీలను పూరింపుము..!!

శ్రీశాంతి.. 28-3-2024 ఖాళీతనం ఒక్కోసారి మరీ ఇబ్బంది పెట్టేస్తుంది. అది బుర్రలో పుట్టి, ఆలోచనను కూడా ఖాళీ చేసి ఏదీ తోచకుండా చేసిప...