ఎప్పుడూ కలలో కొచ్చే గోదారి
ఒడ్డున ఈసారి మనమిద్దరం
ఓ జతైపోయి,గలగల పారే నీటి
సవ్వడిలో మన వలపును
పండించుకుంటాం.
మౌనంగానే ఎన్నో ఊసులు పలికే
నీ ముందు నేను మూగనై కూర్చుంటాను.
నీ ఓర చూపులో తొంగిచూసే
కొంటేదనం మనసులోని
కోరికనంతా బయటేస్తుంది.
మనసును గిల్లుకుంటూ మొహమాటం
మాటున నువ్వు దాచే రహస్యాలన్నీ
పసిగడతాను.
నా మాటలెన్ని పుట్టినా ఒక్కోసారి
నీ ముందు తేలిపోతాయి.
నీ సమక్షంలో నులివెచ్చని సాయంత్రపు
స్పర్శను అనుభవిస్తాను.
అరవిరిసిన పూమొగ్గలా నా చేయి
నీ చేతుల్లో వాలిపోతుంది.
జీవితపు ఆస్వాదనను నీ ఒడిలోనే
కలగంటాను.
అప్పుడూ నా నుంచి నీకు నిశ్శబ్దమే
సమాధానం అవుతుంది.
No comments:
Post a Comment