జ్ఞాపకాల్లోంచి ..

 ప్రేమ ఊసు ఎత్తినప్పుడల్లా

జీవిత సారాన్ని వేళ్ళతో లెక్కగట్టి

నీటిపాయలా జారుకుంటావు..

అయినా నీ చిరునవ్వు

కోసం ప్రాధేయపడతాను.

జ్ఞాపకాల్లోంచి

తొంగి చూస్తున్నప్పుడు

వేకువనే మేలుకున్న సుర్య

బింబమల్లే కనిపిస్తావు.

ప్రేమనీ..విరహాన్నీ నీమీద

చల్లి పోతున్నప్పుడు నా

ఆలోచనామృత జ్వాలలోంచి

నిప్పుకణికవలే ప్రకాశిస్తావు.

యవ్వనం జారిపోతూనే ఉంది

దోసిలిలోని ఇసుక మాదిరి..

నేను నీ గురించే ఆలోచిస్తాను..

చమ్మగిల్లే కళ్ళతో వ్యర్థమైన కోరికను

గుప్పిట పట్టుకుని ఒంటరితనాన్ని

సాయం అడుగుతాను.