మసకబారిన రూపానివి

ఈరోజు నీ జాడను వెతుకుతూ

ఎక్కడెక్కడో తిరిగింది మనసు

ప్రతిచోటా గంభీరంగా నిలబడే 

అక్షరాలను వెంట తెచ్చుకుని 

నిన్ను కూర్చింది

మంచుబిందుల అలంకారాలతో 

మెరిసిపోతున్న గడ్డి పొదల మాటున 

గతకాలపు నీ జాడను వెతికింది

చెట్టు ఆకుల చివర్ల చిందే 

చినుకులను ఒడిసిపట్టి మనం

ఆడిన ఆటలను గుర్తుచేసుకుంది

ఇద్దరం తిరుగాడిన దారులన్నీ 

మసకబారి కనిపించాయి ఇప్పుడు

కొత్తగా పంచుకునేందుకు నీ ప్రేమ 

తరగలు కనిపించలేదు మరి

జగడాలాడే నీ మాటిప్పుడు మచ్చుకైనా 

గురుతులేదు. ఎంత పాతబడిపోయాయి 

నీ జ్ఞాపకాలు

నీ స్పర్శను అనుభవించిన ఈ దేహం..

ఇప్పుడు నీ జాడలన్నీ కలిపి ఓచోట 

ముద్రిస్తుంది నీ రూపాన్నీ..