మనసు..

ప్రేమ గాఢత తెలిసిన

లోపలి స్వరమిది

గాఢంగా పెనవేసుకున్న 

ఈ ఒంటరితనంతో ఎంత చిక్కనీ

నేలను తాకే వాన చినుకుల్ని 

లెక్కకడుతూ 

ఆ తడిగడ్డి మీద గతకాలపు 

నీ అడుగులను వెతుకుతుంది మనసు

అడివిని ముసురుకున్న 

పొగమంచు చందాన

గాలికి ఊగే గడ్డిపూల 

పరిమళాన్ని పట్టుకోవాలనేంత 

పేరాశ కదూ

నిన్ను వెతకడం అంటేనూ

పగలల్లా ఇంతే

నువ్వు విసిరిన నవ్వుల జాడలే 

ఊహలకు ఊతాలు

రాత్రికి వెన్నెలకు మగ్గిన 

చందమామ సాయంతో నిన్ను 

పట్టుకోవాలని చూస్తుంది మనసు

ఎంటో ఈ వెతుకులాట

నాలోకి తొంగిచూసి మరీ 

నీ జాడను పట్టుకుంది.. 

ఈ ఏకాంతంలో మనసు 

ఎంత నంగనాచిదో కదూ