ఆనందం నన్నడిగేది..

ఆనందం నన్నడిగేది..
నన్ను ఎక్కడ దాచావని
అతని చూపులో, మాటలో,
మనసులో, సాంగత్యంలో అన్నాను.
హృదయాన్ని వదిలేసానని,
నింపుకోలేదని పాపం దానికి అనుమానం

నక్షత్రకాంతిలో గాలి రేగింది..
చూపులు కలిసే చోటికి ప్రయాణం
ఆనందాన్ని వెతుకుతూ దారికాని దారుల్లోకి..
ఎండుటాకుల శబ్దానికి మల్లే గుండె శబ్దం..
పిలుపు వినిపించేంత దగ్గరగా
జీవిత రహస్యాన్ని తెలుసుకున్నట్టుగా..

ఆకాశాన్నంతా పూడుస్తున్నాను,
ఇంకా ఆనందం పట్టలేనంత ఉంది.
నింపుతున్నాను, అంతటా, అతనితో కలిసి..
ప్రేమ పుష్పాన్ని వికసింపచేయడానికి..