కళ్ళు..

కొత్తవారిని కళ్ళు వెంబడిస్తాయి.
రెండు కళ్ళను నాలుగు చేసి
చూపులు కలిపేందుకు చూస్తాయి.

 
దారులన్నీ తిరుగుతుంటే కొత్త ముఖాలు
విడివడి జతపడి
ముఖాలకు తగిలించుకున్న చూపుల లెక్కలు
దొంగచూపులు కొన్ని, దొరచూపులు కొన్ని
దోబూచులాటలు కొన్ని, అన్నీ కళ్ళే ఇక్కడ.

 

 
ఆరాధనలు కొన్ని, ఆత్రాలు కొన్ని.
ఇన్ని చూపులు దారులు తప్పినపుడు
చీకటిని మింగి నిదరోయినప్పుడే శాంతి.