ఆవిరి సెగ

గాయం తగిలిన గుండెకు 

మాటలేం వస్తాయి

మునుపు నీతో ఉంది

 ఇప్పుడు ఒంటరిది

వేగంగా వీచే గాలికి 

కాస్త ఊగుతుంది

మళ్ళీ సర్దుకుంటుంది

వెలివేసిన గుండె అది

వేదన బాగా తెలుసు

ఊరూరా ఆలోచనలతో 

తిరిగి అలసి ఇంటికి చేరుతుంది

ఎన్ని కబుర్లు మోసుకొస్తుందో

అందులో నువ్వూ ఉన్నావు 

తనని ఏడిపిస్తూ

ఏ వేళకు నువ్వు ఏం చేస్తావో

ఎరుగుదును, ఆలోచిస్తుంది 

నువ్వు తిన్నావా అని

మోహార్తి తాపాల చెర నుంచీ 

విడిపించుకోవాలని 

గింజుకుంటుంది

నీ నవ్వును ఉదయానికీ 

సాయంత్రానికి ముడివేసి 

ఆడుకుంటుంది.

అప్పుడప్పుడు కలలో 

భవిష్యత్తు భయపెడుతుంది

శూన్యంలోకి లాక్కుపోతుంది

ఎంతటి ఆర్తో నువ్వంటేనూ..

గతాన్ని తలుస్తూ 

వాస్తవానికి భ్రమలను జోడించి

వెలుగునీడల సంగమంలో 

ఆవిరైపోతుంది.