వలపు దారుల జాడతెలియక నిన్నటి రాత్రి
కలియ తిరిగాను అతని జాడ పట్టుకోవాలని
ఆశ..
నిదురంతా చెదిరేంత కల అది
బాధామయ చీకట్ల కావల
అతని జాడ.., అతని ధ్యాసే నాకు
మానస సాగరాన్నై ఎప్పుడూ
అతని తలపును కలగంటాను
జ్వాలలా క్రమంగా ఆక్రమించే అతని ఛాయ
తనువును ఛిద్రం చేనే అతని స్పర్శ
ఎన్ని భారమైన నిట్టూర్పులో
విడుస్తూ కాచుకున్నాను
కలల ఆనకట్ట వేసినప్పుడల్లా
అతని వైపే పయనిస్తాను
నా హృదయ ద్వారాల ముందు
వేకువ చుక్కై మెరుస్తాడు అతడు
నా వలపు తలపులన్నీతెరిచి చూస్తానా
మళ్ళీ అందనంత దూరంగా జరిగిపోతాడు
ఎక్కడో ఏటి ఒడ్డున నిలబడి నాకేసి చూస్తూ..,
శిలగా మారిపోతాడు
ఎంత ఆరాటమో సృష్టించి పోతాడు
సుళ్ళు తిరిగే ఆశల అలజడిలో నన్నో
చకోరాన్ని చేసి..పోతాడు
ఎంత దయలేని హృదయమో..
No comments:
Post a Comment